Николовски даде отчет - Земјоделците добија голема поддршка
Објавено во: Македонија 16 Септември, 2017
Министерот за земјоделство Љупчо Николовски даде отчет за сработеното во првите 100 дена при што најмногу ги истакна исплатите на субвенциите за земјоделците кои се тековни, а беа блокирани, потоа новите огласи за доделување на земјоделско земјиште и продолжување на рокот за аплицирање за субвенции за Програмата за финансиска поддршка за 2017 година и рокот за аплицирање за ИПАРД 2 Програмата.
- Ги скративме непродуктивните трошоци, како што се тековните расходи и договорните услуги. Уште во првите три месеци плативме дел од заостанатите долгови за членарини во меѓународните институции, кои нудат огромна техничка и финансиска помош за развојот на македонското земјоделство. Со плаќање на заостанатите долгови за консултантски услугиза Проектот Јужно вардарска долина втора фаза, ја откочивме реализацијата на овој проект, кој е од витално значење за наводнувањето и со кој што ќе бидат опфатени 4.000 хектари за наводнување - рече Николовски.
Тој додаде дека интензивно се работи на промоција на извозот на македонските земјоделско-прехранбени производи. Исто така започнат е и процес на ревизија на решенијата на претходната власт за кои постојат сомнежи дека нанеле штети на буџетот.
Главни проблеми со кои Николовски се соочи како министер беа пожарите низ државата, ниската откупна цена на повеќе земјоделски производи, временски непогоди и друго.