НОВ ЗЕМЈОТРЕС: Мексиканците на нозе, во страв ги напуштаат своите домови
Објавено во: Свет 23 Септември, 2017
Повторно се стресе Мексико, а граѓаните во паника избегаа од своите домови.
Новиот земјотрес ја погоди земјата во 7:53 часот на длабочина од 10 километри со епицентар околу 12 километри северно од градот Истепек. Ова е околу 530 километри јужно од главниот град Мексико Сити кој деновиве беше разорен од земјотрес.
Мексиканската сеизмолошка управа потоа ја намали јачината на потресот на 6,1 степени, иако претходно објавија дека е од 6.4 степени.
Засега нема информации за повредени, смртни случаи или оштетувања.
Американскиот геолошки институт во своето соопштение наведува дека постои „мала веројатност за жртви и материјални штети“ при денешниот потрес.
Имаше вкупно три земјотреси во близина на брегот кај Паредон, на длабочина од 74,2 км до 10 км.
Мексико во вторникот го погоди земјотрес со јачина од 7,1 степени при што загинаа најмалку 295 лица. Месецов имаше и земјотрес од 8,1 степени во јужната држава Чијапас.
Мексико лежи на место каде што се среќаваат три големи тектонски плочи, и поради тоа е склон кон неколку земјотреси за кратко време.