НОВИ МЕРЕЊА: Штедењето порасна за 60 милиони евра – генератор денарските депозити!

Добивај вести на Viber

Февруарски пораст на депозитната база регистрираше Народната Банка. Во вториот месец од годинава вкупните депозити на ниво на банкарскиот сектор достигнаа ниво од 4 милијарди и 280 милиони евра. Во однос на јануари, растот изнесува скоро 50 милиони евра. Според најновите податоци на НБРМ, пораст има и кај штедењето во девизи и кај штедењето во денари, кое и натаму доминира во вкупната валутна структура на депозитите. Така, во февруари вредноста на денарските депозити изнесува 2,4 милијарди евра додека на девизните 1,8 милијарди евра. Според мартовската анализа на НБРМ остварениот раст на депозитите целосно се должи на штедењето во денари, додека растот на девизните депозити е незначителен. Учеството на денарските депозити во февруари од 50% се зголеми на 50,3%. “На крајот на февруари, годишната стапка на раст на вкупните депозити изнесува 5,6% и е над проекцијата според која се предвидуваше раст од 3,9% за првиот квартал. Притоа, вкупните депозити се повисоки од нивото проектирано за првото тримесечје на 2014.“ – пишува во најновиот мартовски извештај на НБРМ во кој се констатира дека растот на депозитите главно го повлекува населението додека приватниот сектор учествува со 20% во вкупниот раст на депозитната база. Во февруари граѓаните во банките на штедна книшка чувале 3,1 милијарда евра. По јануарското топење на депозитите на приватниот сектор, во февруари се забележува пораст, па така депозитите на фирмите достигнаа ниво од 902 милиони евра. Во исто време Народната Банка регистрираше намалување на јазот меѓу каматите што банките ги исплаќаат за девизните и за денарските кредити. Во февруари каматните стапки за денарските кредити се намалиле за 0,2 а за девизните депозити за 0,1 процентен поен.