Од демографија до политички промени: Расте наталитетот кај Албанците
Објавено во: Балкан 02 Февруари, 2013
Многу брзо, за околу дваесетина години отсега, Албанците ќе станат најбројна нација на Западен Балкан, покажуваат истражувањето насловено „Показатели за светскиот развој“ на Светска Банка, а пренесе турската агенција Анадолија.
Во анализата на Банката се наведува дека најголем природен прираст на населението на Балканот има во Косово, а истиот че расте и во иднина, па во периодот 2010-2020 година Косово се очекува да има просечен годишен природен прираст од 0,7 отсто, што би бил еден од највисоките во Европа.По Косово следи Албанија со очекуван годишен природен прираст од 0,2 проценти, а на третото место е Македонија, која според Банката „има голем процент на албанско население“, со нулта стапка на прираст, односно со ист број на новородени и починати.
Во сите останати земји од Западен Балкан до 2020 година ќе има негативен природен прираст, во Србија тој ќе изнесува минус 0,2 отсто, Хрватска од минус 0,3, а во Босна и Херцеговина минус 0,4 проценти.
Аналитичарите предупредуваат дека ваквите демографски промени би можеле значително да влијаат врз политичката ситуација на Балканот и во иднина да поттикнат разни политички и територијални претензии.
Инаку, во европски рамки највисок природен прираст ќе има во Турција и Ирска од по 1%, а најнизок во Бугарија од минус 0,7 отсто.