Од МВР се бара 400 полициски приправници да бидат распоредени на позицијата полицаец
Објавено во: Македонија 21 Април, 2017
Независниот полициски синдикат бара од министерот за внатрешни работи, Агим Нухиу итно да бидат распоредени 400 полициски приправници на позицијата „полицаец“.
Претседателот на Независниот полициски синдикат, Гоце Делчев Тодев, на прес-конференција изјави дека 400 полициски приправници кои успешно ја поминале обуката за полицајци и добиле решение за приправнци од Министерството за внатрешни работи, наместо за полна плата од околу 24.000 денари, работат за плата од 11.200 денари, затоа што не се прераспроедени на позициите, согласно Правилникот за систематизација на Бирото за јавна безбедност.
„Го замолувам министерот за внатрешни работи ова да го сфати како сериозна порака лично од моја страна и од Независниот полициски синдикат“ – вели Тодев.
Тодев додава дека на 20 мај истекува рокот во кој Министерството за вантрешни работи треба да ги да ги изготват решенијата за полицајци.
Тој вели дека на средбата со претставници на МВР им било кажано дека во услови на политичка криза, ресорниот министер има само технички овластувања и нема можност да ги потпише решенијата.
Тодев се пожали дека полицајците немаат вода за пиење во караулите во Танушевци и Гошинце и се снаоѓаат сами, полнејќи вода од селски чешми. Причината, како што рече тој, е тендерот кој очигледно или е запрен, или не е распишан.
Колегите го прашувале Тодев дали има можност Министерството да се заложи за нови тендери и да се стави крај на овој проблем.
Тодев посочи дека ќе почекаат да се реши проблемот, во спротивно најавија дека ќе побараат анализа на водата од санитарната инспекција.