Добивај вести на Viber
Предвремената продажба на евро обврзницата нема да ја намали вредноста на портфолијата на двата пензиски фонда, тврди министерот за труд и социјална политика Спиро Ристовски.
Како што истакна на денешната прес конференција, благодарение на дополнителниот принос на индивидуалните сметки на членовите на вториот пензиски фонд, корисниците ќе добијат повеќе средства на сметките.
„Од остварените резултати од продажбата евидентно е дека двата пензиски фонда оствариле капитална добивка од околу 10 милиони евра. Пензиските друштва ќе можат да вложуваат во државни обврзници издадени во Македонија, но не и во еврообврзници кои Република Македонија ги издава на меѓународниот пазар на капитал“, изјави Ристовски пред медиумите.
Тој потсети дека пензиските фондови во своето портфолио ги поседуваат двете македонски евро обврзници издадени на странски пазар. Едната македонската обврзница достасува на 8 јануари 2013 и за неа нема потреба од предвремена продажба. Втората македонска обврзница достасува во декември 2015 година и поради тоа постојните портфолија на пензиските фондови мора да се усогласат до 15 јануари 2013 година.
Според Министерот, преку предвремената продажба на евро обврзница нема да се намали вредноста на средствата на пензиските фондови, а резултатите од досегашниот период на функционирање на вториот пензиски столб, покажуваат успех и раст на фондовите и во бројот на членови и во висината на средства со коишто управуваат.
Тој информираше дека задолжителните фондови имаат повеќе од 312.000 илјади членови и средства во висина од околу 19 милијарди денари, или околу 310 милиони евра,што претставува околу 3.35% од БДП-то во земјава.