Од ВМРО-ДПМНЕ бараат да се повлече Законот за употреба на јазиците
Објавено во: Македонија 22 Јануари, 2018
BМРО-ДПМНЕ бара Владата да го повлече Законот за употреба на јазиците и да се формираат работни групи од претставници на сите парламентарни партии, експерти како и претставник од кабинетот на претседателот Ѓорѓе Иванов.
Ова се нивните барања, за како што велат, новото законско решение да не излегува од рамките на Уставот.
Од партијата велат дека овој закон ќе создаде еден гломазен и нефункционален систем, чија примена ќе има и практични потешкотии.
„Владата сака да го протурка на мала врата, без поширока консултација со стручната и експертска јавност која во голем дел се изјасни против. Воедно овој закон се носи и без присуство на опозицијата во Парламентот што укажува на штетноста на законското решение и неспремноста низ демократски амбиент да се носат решенија од кој корист ќе имаат сите граѓани во Република Македонија“- вели Игор Јанушев, генерален секретар на партијата.
Законот за употреба на јазиците е изгласан во Собранието, но претседателот Ѓорге Иванов стави вето односно не го потпиша указот.