Општина Илинден со Светска банка го реализира проектот „Енергетска ефикасност“

Добивај вести на Viber

По повод 5 Март, Светскиот ден на енергетската ефикасност во посета на општина Илинден престојуваше Малгожата Маркиевич Богов, директор на проектот за подобрување на општинските услуги при Министерството за финансии и претставник на Светска банка во Република Македонија.

Маркиевич Богов се сретна со градоначалникот Жика Стојановски, ги посети ОУ „Гоце Делчев“ и општинската детска градинка „Гоце Делчев“, каде во соработка со Светска банка беше подобрена енергетската ефикасност преку инсталирање централен систем за греење и ладење со геотермални топлински пумпи, со користење обновливи алтернативни извори на енергија, при што заштедата изнесува повеќе од 60 проценти.

- Општина Илинден беше една од првите општини во Република Македонија што почна да ја применува енергетската ефикасност. Уште пред неколку години ваков систем за греење и ладење со геотермални топлински пумпи беше инсталиран во ОУ „Браќа Миладиновци“, информира општина Илинден.

За време на престојот во општина Илинден, гостите го посетија и Модуларното училиште кое исто така претставува високо енергетско-ефикасен објект, со иновативен пристап и воведени нови технологии и еколошки материјали, греење и ладење со алтернативни извори на енергија, со искористување на топлинската енергија од подземните води.

- Со имплементацијата на овие проекти се придонесува не само за заштеда на финансиски средства во буџетот на општината за затоплување на овие јавни објекти, туку и за подобрување на условите во образованието, а заштедените средства ќе бидат наменети за реализација на многу други инфраструктурни проекти, се вели во соопштението.