Oткриен мотивот на напаѓачот од Тексас
Објавено во: Свет 06 Ноември, 2017
Американецот кој вчера во Тексас уби најмалку 26 луѓе, бил поттикнат од семејна расправија, јавуваат денеска локалните власти.
„Во тоа семејство имало сериозна кавга“, изјави Фриман Мартин, функционер на силите на редот на Тексас.
Тој додава дека мајката на сопругата на напаѓачот Девин Кели одела во црквата која беше мета на напад.
„Мајката на неговата сопруга доаѓала во црквата. Знаеме дека добивала заканувачки смс пораки од него. Ова не е мотивирано од раса, ниту пак од верски убедувања“- изјави Мартин.
Станува збор за најголемото масовно убиство во поновата историја на Тексас и едно од најлошите во современата историја на САД.
Девин Патрик Кели, се појавил во баптистичката црква во Садерленд Спрингс, селце со 400 жители, во 11:20 часот облечен во црно и со панцирен елек. Отворил оган од полуавтоматско оружје и убил 26 луѓе, меѓу кои и деца.
Жртвите се на возраст од 18 месеци до 77 години. Меѓу нив има и осум члена на едно семејство вклучувајќи и жена во петтиот месец на бременоста и три нејзини деца. Убиена е и ќерката на свештеникот на возраст од 14 години.