Откриени 4 тони злато во потонат нацистички брод
Објавено во: Свет 24 Јули, 2017
Вработените во британската компанија Advanced Marine Services (AMS) откриле сандак со големо количество злато во потонат германски брод од Втората светска војна во близина на брегот на Исланд. Се претпоставува дека благородниот метал е украден од банки во Јужна Америка и дека тежи околу 4 тони.
Се смета дека златото било доставено од соработници на „Banco Germanico“, подружница на Германската дрезденска банка.
Сандакот е пронајден во поштенска просторија на нацистичкиот брод Minden, кој во септември 1939 година, веднаш по избувнувањето на Втората светска војна, пловел од Бразил во насока на Германија. Бродот бил забележан од британски крузери и по наредба на Адолф Хитлер тој е потопен, за да не му се даде можност товарот да биде конфискуван.
Со образложение дека откритијата му припаѓаат на тој што ги открил, сега AMS сака да го однесе златото во Велика Британија. За целта компанијата побарала од исландската влада дозвола да пробие дупка во трупот на бродот и да го извади сандакот на површината. Се очекува локалните власти наскоро да дадат мислење чија сопственост е златото, што се наоѓа во Атлантскиот Океан на 190 километри (120 милји) југоисточно од Исланд.