Оваа земја не е во еуфорија по победата на Трамп...
Објавено во: Свет 10 Ноември, 2016
Русија не е во еуфорија по победата на Доналд Трамп на претседателските избори во САД, бидејќи милијардерот може да се покаже исто толку антируски поставен како својот претходник.
Ова го изјави заменик-министерот за надворешни работи на Русија Сергеј Рјабков, пренесува Франс прес.
„Нема никаква еуфорија. Не сакам да создаваме впечаток дека сме исполнети со надеж" - рече Рјабков за руската агенција Интерфакс.
Не очекуваме ништо посебно од новата американска администрација, додава Рјабков. Вели дека Москва имала контакти со екипата на новоизбраниот американски претседател, но не даде повеќе детали.
„Позициите кои Трамп и луѓето од изборниот штаб ги изразија во однос на Русија за време на предизборната кампања, беа доста тврди“ - рече тој.
Овие коментари се разминуваат со мислењето изразено во последно време од руски државници кои беа благонаклони кон Трамп, отколку кон опонентката Хилари Клинтон, истакна АФП.
Клинтон неколкупати го обвини својот противник од Републиканската партија дека е марионета на Владимир Путин.
Рускиот претседател му честиташе вчера на Трамп за победата и изрази подготвеност да го направи неопходното од своја страна за обновување на односите со Вашингтон.