Пакет со експлозив доби Шојбле од Грција
Објавено во: Свет 16 Март, 2017
Пакет со експлозивна материја е добиен по пошта во Министерството за финансии на Германија во Берлин на име на министерот Волфганг Шојбле.
Тој бил испратен од грчката престолнина Атина, пренесе Франс прес, цитирајќи грчки политички извор.
Според истиот извор германските и грчките власти соработуваат во истрагата за случајот.
Според германскиот весник „Билд", цитиран од ТАСС, за испраќач на сомнителниот пакет бил наведен грчкиот пратеник Спиридон-Адонис Георгиадис.
„Терористот или терористите очигледно го користеле моето име, бидејќи во Грција јас се сметам за пријател на Германија и на господин Шојбле"- вели грчкиот политичар за весникот.
Сомнителниот пакет стана причина за евакуација на неколку простории од зградата на министерството во Берлин. Беа повикани експерти за експлозиви, кои го уништија експлозивот.
Според податоците на берлинската полиција експлозивите во пакетот биле со ниска моќност, слични на употребените во огномет. Тие сепак можеле да предизвикаат бројни трауми, ако бомбата експлодираше при отворањето.