Партијата на Лазар Еленовски ја напушта коалицијата на ВМРО-ДПМНЕ
Објавено во: Македонија 24 Јули, 2017
Социјалдемократската унија донела одлука да излезе од коалицијата „За подобра Македонија“ предводена од ВМРО-ДПМНЕ.
Одлуката била иницирана од општинските организации на партијата, а била потврдена од нејзиното претседателство.
„Социјалдемократската унија останува активна на македонската политичка сцена и во иднина ќе продолжи да се залага за конструктивен политички дијалог во општеството и за обновување на довербата на граѓаните, за спроведување реформи од кои ќе имаат корист сите граѓани и со кои ќе се унапредат евро-атлантските аспирации, за реформи кои ќе ја засилат демократијата, градењето здрави меѓуетнички односи, политички дијалог помеѓу политичките чинители, како и решавање на клучните прашања што ни го попречуваат патот кон зачленување во НАТО и добивање датум за почнување преговори за членство во Европската Унија“ – се наведува во соопштението од оваа партија.
Партијата смета дека ова е многу значаен период за Македонија и пресуден за подобрата заедничка идина на сите наши граѓани. Се надеваат дека обединети сите ќе придонесат за реформи.