Петрески: Препораката на ММФ да се зголеми старосната граница за пензионирање е избрзана
Објавено во: Економија 20 Септември, 2017
Реформата за пензискиот систем треба да биде темелна, и составена од повеќе мерки така што товарот од неа нема да падне само врз една засегната страна, во случајов идните пензионери кои ќе се пензионираат на повисока возраст, вели универзитетскиот професор Марјан Петрески.
Извештајот на ММФ тој го толкува во светло на тоа дека истиот алудира да се стави акцент на создавањето повисока додадена вредност во економијата, наместо фокусот да биде врз социјалните трошења и прераспределбата преку даноците, бидејќи фискалниот простор за зголемување на трошењата а без притоа да создадеме нова вредност е истрошен.
„Дури фондот коректно предвидува дека и при одредена фискална консолидација, буџетскиот дефицит и јавниот долг би се продлабочувале.
Очекувано, главен акцент е ставен на реформата на пензискиот систем, меѓутоа со оглед дека нема студија која детално се занимава со овој проблем, би рекол дека препораката на фондот да се зголеми старосната граница за пензионирање е избрзана. Реформата треба да биде темелна, сеопфатна и микс од мерки така што товарот од неа нема да падне само врз една засегната страна, во случајов идните пензионери кои ќе се пензионираат на повисока возраст, туку тој товар заеднички да го поднесат и идните пензионери, и сегашните пензионери, и оние со бенефициран стаж, и помладите работници.
Да забележам дека регресивната структура на придонесите која се споменува во извештајот е веќе ирелевантна, односно не постои, со воведувањето на минималната плата од 12.000 денари. Минималната основица за пресметка на придонесите беше 50% од просечната бруто плата, што значи била околу 16.000 денари, а со најновата минимална нето плата од 12.000 денари, бруто основицата е 17.000 денари, значи регресивната структура која ја критикувавме во претходните 10 години престана да функционира по автоматизам.
Се на се, извештајот го оценувам позитивен и секогаш добредојден во поглед на преглед на состојбата со економијата, но лично сметам дека некои прашања кои фондот ги дава како bold препораки заслужуваат подетална економски ригорозна анализа и соодветна јавна дебата“, посочува Петрески.
Н.С.