Добивај вести на Viber
Фондот за пензиско и инвалидско осигурување (ПИОМ) во соработка со Управата за јавни приходи (УЈП) и Финансиската полиција ќе контролира 275 акционерски друштва и друштва со ограничена одговорност во кои државата има капитал. За таа цел трите институции денеска ќе потпишат меморандум за соработка.
Фондот на ПИОМ ќе подготви акциски план, во кој ќе бидат утврдени сите неопходни активности, а ќе се вршат и надворешни контроли од страна на управите за јавни приходи и за финансиска полиција, за постојано следење на работата на трговските друштва, со цел да се заштити имотот на Фондот и, воедно, имотот на државата.
ПИОМ очекува на овој начин да обезбеди редовна уплата на придонесите за 508.873 осигуреници, како и сигурна исплата на пензиите за 285.411 корисници на пензија.