Добивај вести на Viber
Околу 42 илјади граѓани поднеле барање за искористување на мерките за отпис на долгот. Од нив околу осум илјади барања стигнале во рацете на доверителите минатава година, а 2.000 веќе биле решени.
Ова во интервју за МРТ го истакна вицепремиерот и министер за финансии Зоран Ставрески кој нагласи дека со мерката се опфатени најранливите категории граѓани.
Право на отпис на долговите имаа невработени лица, корисници на социјална парична помош, лица кои поради болест или смрт на близок член од семејството не можеле да ги подмират обврските.
Мерката ги опфаќа долговите настанати заклучно со 31-ви декември 2013-та, и тоа по основ на потрошена електрична енергија, топлинска енергија, кредитни картички, пречекорувања на трансакциски сметки и потрошувачки кредити, како и долгови за радиодифузна такса.
Граѓаните кои поднеле барање за отпис на долгови, најчесто барале да им бидат отпишани долговите по основ на електрична енергија, долговите кон банките од кредитите и кредитните картички, како и радиодифузната такса.