Пожарот во Главната пошта предизвикал помала материјална штета!?
Објавено во: Мои пари 16 Јануари, 2013
Вчерашниот пожар во зградата на Македонски пошти предизвикал минимални штети. Сервер салата и архивата, како и првиот кат останале неоштетени, додека последици од огнот има на покривот, шалтер салата и неколку канцеларии од вториот кат, соопшти директорот Рафиз Алити.
Тој појасни дека поштата функционира нормално, пратките се сигурни, а се надеваат дека уште денеска ќе се поврзе опремата за да функционира уплатата и исплатата. „Засега не можеме да ја кажеме висината на штетата во пожарот. Управниот одбор на АД „Македонска пошта“ - Скопје и денеска ќе се состане. Уште утре ќе се формира Комисија која ќе ги направи проценките за висината на штетата. Денеска истражните органи се во зградата и ги утврдуваат причините за пожарот“, рече Алити кој појасни дека пожарот избил на вториот кат најверојатно поради спој на електрични жици.Според Алити, за четири до пет дена сите вработени ќе се вратат во зградата бидејќи канцелариите биле во добра состојба.