Позната причината за падот на воениот авион во Мјанмар

Добивај вести на Viber

Истрагата на воздухопловните власти на Мјанмар утврди дека главната причина за падот на воениот авион во кој загинаа 122 патници и членови на екипажот е големата бура во која влетал пилотот. Авионот минатиот месец се урна во Мјанмар, во Андамско Море, во Југоисточна Азија.

Авионот полетал од градот Мјелк, на крајниот југ на Мјанмар, кон главниот град Јангун. Најголем број од патниците биле воен персонал на мјанмарската армија и нивните семејства, меѓу кои имало и деца.

Според наодите на комисијата, пилотот на леталото ја загубил контролата, кога авионот влетал во густи облаци и силно невреме.

Бурата предизвикала да се создаде мраз на крилата од авионот и откажување на работата на еден од моторите.

При преслушувањето на „црната кутија“ истражните органи не откриле ништо сомнително, па заклучокот на комисијата е дека воениот авион не се урнал во морето поради саботажа, експлозија или проблеми со некој од четирите мотори.

Паднатиот авион е од кинеско производство.

Ова беше најголемата авионска несреќа во Мјанмар, каде последниве неколку години се регистрирани неколку авионски инциденти со трагични последици.

Медиумите во Јангун забележуваат дека иако во време на паѓањето на авионот, Мјанмар беше во период на монсуните, проследено со многу дожд и повремени бури, претходно немало извештаи за лошо време на трасата по која полетал воениот транспортер.

Авионски експерти засега немаат објаснување за постапката на пилотот кој влетал во бурата и густите облаци, наместо да ги одбегне, кога се знае дека радарите на авионите предупредуваат на таквите ситуации.