Добивај вести на Viber
Со 67 гласа „за“ , а 26 „против“, пратениците го изгласаа Буџетот за 2014 година. По расправа од 5 дена, повеќе од 600 амандмани и жестока дебата, но без протести и бркање пратеници и новинари од собраниската сала, е донесен буџет во кој се проектира растот на БДП од 3,2 проценти и инфлацијата на 3,3 проценти. Идната година касата ќе тежи 2,86 милијарди евра или за седум отсто повеќе од годинава.
Буџетот во 2014 ќе овозможи подинамичен економски раст преку реализацијата на капиталните инвестиции, смета министерот за финансии Зоран Ставрески. Тој повтори дека ќе растат пензиите и социјална помош, но и субвенции од 140 милиони евра.
„Сите овие факти покажуваат дека Владата посветува внимание на поддршка на сите граѓани од ранливи категории. Освен силната развојна, вклучуваме и димензија на социјална стабилност“, рече Ставрески пред пратениците.
Дефицитот е утврден на 3,5 отсто. Ова ќе значи и ново задолжување од околу 300 милиони евра, што според Ставрески ќе се финансира од домашни и од странски извори. Додека тој го бранеше буџетот, од опозицијата истакнаа дека е неразвоен, нереален и дава можност за манипулирање и купување гласови пред избори. Тие потсетија на настаните од ланскиот 24 декември.
„Добро е што дебатата траеше пет дена, колку што е предвидено за граѓаните да имаат шанса барем делумна да ги чујат двете спротиставените мислења, алтернативни концепти кога станува збор за трошењето на нивните средства“, забележа координаторот на СДСМ, Игор Ивановски.