Пратениците ќе бираат потпретседатели на Собранието
Објавено во: Македонија 20 Февруари, 2018
Денес по двонеделно немање пленарни активности поради службени патувања на пратеници, собранискиот спикер Талат Џафери закажа две пленарни седници, а најавени се и неколку комисии. Собранието на Република Македонија ќе го одржи второто продолжение на 26.седница, а по неа и 34.седница.
Пратениците во рамки на 34.седница ќе расправаат по предлог – изборот на потпретседатели на Собранието на РМ, поднесен од група пратници, предлог-одлуката за објавување на јавен оглас за избор на претседател, потпретседател и шест членови на ДИК, предлогот за разрешување на претседател и членови на Државната комисија за одлучување во управна постапка и постапка од работен однос во втор степен.
Ова ќе биде втор обид да се изберат потпретседателите откако претходниот обид пропадна по реакцијата на опозицијата дека точката била ставена на дневен ред во последен момент, а тие немале време да ја разгледаат, како што тогаш образложија од ВМРО-ДПМНЕ.
Пратениците ќе расправаат и по предлог-законите за дополнување на Законот за судовите, за изменување и дополнување на законите за заштита на укажувачи, за народниот правобранител. Пратенците ќе ги разгледуваат и дополнувањата на законите за вработените во јавниот сектор, за Управата за јавни приходи, за придонеси од задолжително социјално осигурување, за даночна постапка, за сигурност во железничкиот систем, по скратена постапка. Ќе бидат разгледани и предлог-законите за ратификација на Договорот меѓу Владата на Република Македонија и Владата на Република Србија за соработка во областа на туризмот, за ратификација на Договорот за воена финансиска соработка меѓу Владата на Република Македонија и Владата на Република Турција, за ратификација на Договорот меѓу Македонската Влада и Израелската Влада за одбегнување на двојното оданочување и за заштита од фискална евазија по однос на даноците на доход.