Добивај вести на Viber
ЈКП „Водовод и канализација“ од Прилеп ја започна постапката за управување со повеќе водоводни системи во населените места во Општината, соопшти на денешната прес-конференција директорот на претпријатието Сашо Николоски.
Тој информира дека со одлука на Советот на општина во Прилеп веќе се преземаат ингеренциите за водоводите во селата Чепигово и Тројкрсти, а потоа и во Загорани и Веселчани.
- Екипите се на терен за да ја констатираат состојбата со водоводната мрежа, техничките проблеми што ги има и за да се постават нови водомери, вели Николоски, додавајќи оти целосното преземање и управување со селските водоводи треба да биде до крајот на годинава.
Во сите четири села станува збор за близу двесте водомерни места, а по Нова година ќе се преземат уште стотина во Ерековци. Во прилепското село Подмол водоводната мрежа треба да се гради. Прилепски водовод ќе го преземе управувањето со водоводите во речиси сите населени места во Општината.
- Населението само не може да се грижи за водоводните системи. Прилепски водовод ефикасно ќе се справува со обврската, објаснува Николоски.
Што се однесува до водоснабдувањето во Прилеп, тој тврди дека нема никакви проблеми. Најавите за дождлива есен овозможуваат градот да се снабдува само од системот „Студенчица“ од каде добива околу 300 литри вода во секунда, а во функција се само старите бунари.