Приштина не сака Русија да се меша во дијалогот со Белград
Објавено во: Балкан 04 Септември, 2017
Косово не сака во дијалогот со Србија да се вклучи Русија.
Министерката за дијалог во косовската влада, Едита Тахири ја отфрли можноста за вклучување на Русија во дијалогот за нормализација на односите на Белград и Приштина, во кој посредува Европската Унија.
Учеството на Русија „би било неприфатливо“, изјави Тахири, пишуваат косовските медиуми.
Оваа реакција на Тахири следи по пишувањата на српските медиуми дека во дијалогот меѓу Белград и Приштина до крајот на годината би можеле да се вклучат нови „играчи“ – од Германија и Америка доколку со тоа се согласат двете страни, но и дека српскиот државен врв би можел да бара вклучување на Русија.
Како што се шпекулира, разговорите со српскиот и албанскиот тим во иднина во име на Европската Унија оперативно би можел да ги води многу искусен германски политичар, додека Вашингтон би станал „набљудувач на целиот процес“.
Високата претставничка на Европската Унија за надворешна политика, Федерика Могерини би останала главен медијатор на дијалогот.