Притисокот пресилен, руската Сбербанк напушта низа европски земји
Објавено во: Економија 26 Септември, 2017
Руската Сбербанк планира да напушти низа европски земји поради сериозни потешкотии во бизнисот, изјавил претседателот на Управата на таа банка Херман Греф.
Како што наведува, сериозните потешкотии во работата произлегуваат од силниот регулаторен притисок поврзан со санкциите против Русија.
„Моментално ги оптимизираме нашите бизниси во Европа, а од низа земји ќе си заминеме. Во Европа е исклучително тешко да се работи под санкции“, рекол Греф .
„Таму (во Европа) сме под исклучително силен притисок на регулаторите. Иако на тој пазар не припаѓаме во редот на големи банки, зацврстени сме меѓу системски важни банки под директен надзор на ЕЦБ, а тоа сериозно ни го комплицира животот. За мала банка да ги сноси сите трошоци поврзани со директниот надзор на ЕЦБ над системски важните банки, не е едноставно“, рекол Греф.
Најавил поголема концентрација на пазарот на земјите од поранешниот Советски сојуз.
Европскиот бизнис на Сбербанк е организиран во групација на Сбербанк Европа со седиште во Виена откаде се управува со мрежа банки-ќерки во Словачка, Чешка, Унгарија, Словенија, Хрватска, БиХ, Србија, Украина и Германија. Освен тоа, Сбербанка работи преку ќерка фирма во Швајцарија.
Ова лето Сбербанка го продаде бизнисот во Словачка, но како што се наведува, најнеуспешен пазар за оваа банка станала Хрватска, каде во 2016 година властите ги обврзале банките повторно да ги пресметаат хипотеките на населението по стапка која не е профитабилна за банките, што довело до загуби, а уште 1,1 милијарди евра Сбербанка може да изгуби поради кредитот на Агрокор.