28 Март, 2024
0.0263

Промоција во услови на рецесија

Објавено во: Колумни 14 Ноември, 2013

Добивај вести на Viber

Можеш да промашиш неколку пати во текот на натпреварот, но ако погодиш во последните секунди од играта тогаш си херој!

Така е и во животот, во ситуации кога ни е најтешко треба да покажеме сила и карактер. Кризните ситуации или ќе не “кутнат” или ќе не однесат на повисоко ниво. Кога имаме криза на сите ни е  тешко, но најлесно  е да се помириш со моменталната ситуација и ништо да не правиш. Тогаш самиот си одговорен за својата судбина.

Доколку успеете кризните ситуаци, и покрај моменталниот очај да ви бидат поттик и пресвртна точка во животот, тогаш дефинитивно имате желба и енергија за успех.

Некој ќе рече, лесно е ова да се каже, како од учебник за самопомош, но реалноста и емпириската наука тоа го потврдуваат.

Теориските и практичните искуства на развиените економии  би требало серизно да ги разгледуваме. Последниве 10-15 години, период на постојани кризи, турбуленции и неизвесност (застрашувачки многу војни, многу повеќе отколку во периодот на светската биполарност) се спроведени истражувања во повеќе земји и добиени се заклучоци кои укажуваат дека оние компании кои прифатиле деловен ризик во услови на рецесија и кои се решиле за активна  маркетинг стратегија и одржување на промотивните активности на високо ниво, оствариле позитивни резултати. Прифатениот деловен ризик се покажал исплатлив, а овие компании го одржале својот профит и оствариле зголемување на својот пазарен удел.

Општата криза треба да биде сигнал дека нешто треба да се смени!

Доколку се анализира оденесувањето на компаниите во услови на рецесија/криза, ќе се забележи дека компаниите најчесто се многу пасивни, тактизираат и чекаат подобри времиња за да реализираат одредена активност. Оваа година ќе преспиеме, само да не згаснеме па за следната ќе видиме. Пасивно деловно однесување,  кое повеќето деловни субјекти повеќе или помалку го имаат прифатено, особено во делот на промоцијата, а токму тоа создава квалитетна дистинкција во однос на останатите.

Во услови на намалена куповна моќ на населението, се случува  намалување на побарувачката и следствено на тоа и на продажбата. Со цел производните компании да не создаваат непотребни вишоци на производи-кои значат само трошок за нивно чување- се решаваат да го намалат своето производство, додека пак трговските компании поради намалениот промет ги намалуваат или откажуваат своите нарачки.

Доколку рецесијата е длабока, менаџерите се решаваат и на подрастични мерки, ги намалуваат платите или пак го прават најлошото отпуштаат вработени, наместо заедно да седнат да поразговараат И да најдат решение за надминување на кризата.   Слична ситуација, можеби не до тој степен изразена (или пак не би сакале да признаеме) се случува и во Македонија. Рецесија сепак постои, и не е случајно зошто сите сакаат да работат во администрација, која е имуна на вакви влијанија (а до кога вака незнам!). Во таква ситуација менаџерите најпрво се решаваат на намалување на промотивните активности. Промотивните буџети се врзуваат со продажбата, промоцијата се третира како непотребен трошок, како нешто луксузно. И кога нема продажба нема ни промоција.

Промотивните активности и покрај фактот дека сметководствено претставуваат трошоци, по својот карактер и економска функција претставуваат инвестиција. Инвестиција која во иднина ќе придонесе за зголемување на продажбата и пазарниот дел, до подобар имиџ.

Промоцијата денес е еден вид на субкултура, нешто на што сме навикнати,  што секојдневно го коментираме, едноставно еден вид на информатор кој визуелно ни го збогатува животот и ни помага во процесот на нашето рационално однесување. Неопходност со цел да се излезе од анонимноста, да се оствари влијание и посакуваната цел. Во спротивно доколку не се промовираме препуштени сме на пазарниот хазард. Со правилно избрани промотивни активности ни се зголемуваат и шансите за успех.

Затоа не треба да се однесуваме стереотипно, туку напротив треба да имаме активен однос кон нештата и да преземаме поголем ризик. Вистинската шанса за успех се добива ретко или никогаш, но тогаш треба да бидеме подготвени и брзо да реагираме.

Во услови на рецесија кога сите ги одложуваат активностите, се раѓа и вистинска шанса за храбрите. Се согласивме дека треба да се биде активен, но подеднакво важно е и каков канал на промоција ќе се одбере. Во ваква ситуација особено се наметнуваат односите со јавноста како релативно ефтина, кредибилна и ефективна алатка за промоција. Дозволуваат креативност, а нивното влијание е огромно.

Доколку се префрлиме во авертајзинг делот, не е сеедно на еден интренет портал дали има два или десет банери. Дали ТВ рекламната порака е единствена во рекламниот блок или пак е заедно со уште десет други. Не е сеедно дали во еден дневен весник нашиот оглас е на иста страница со уште три други огласи, а од вкупно 20 страници во весникот 10 страници се рекламни.

Постојат и практични примери реализирани во Македонија, кои потврдуваат дека ова не е теорија или пракса карактеристична само за развиените економии.

Пример:  Во времето на војната во Србија, во состојба на паника и неизвесност се реализираше една нормално фреквентна ТВ кампања,  за козметички производ. Беа планирани најгледаните програми (во тоа време вестите). Рекламните блокови беа кратки или речиси и да ги немаше. Ризикот беше голем, сепак стануваше збор за козметички производ,  не основен прехрамбен производ за кој е логично да постои голема побарувачка во таква состојба.

Што се случи? Само една недела по завршувањето на рекламната кампања, беа продадени дури и резервните количини од козметичкот производ. Требаше да се организира нова нарачка за да се задоволи зголемената побарувачка.

Ова е можеби екстремен случај, но сепак доволно реален за да ја поткрепи наведената теза, дека вреди да се ризикува и вложува во промотивни активности дури и во услови на криза.

Се потврдува дека веќе е излишно прашањето дали е потребна промоцијата или не, а се наметнува прашањето како и кога да се реализира.

Сашо Дуљанов

Можеби ќе ве интересира

ЗА (НЕ)ПРИМЕНАТА НА ИЗМЕНИТЕ И ДОПОЛНУВАЊАТА НА ЗАКОНОТ ЗА ОБЛИГАЦИОНИ ОДНОСИ

ЗА (НЕ)ПРИМЕНАТА НА ИЗМЕНИТЕ И ДОПОЛНУВАЊАТА НА ЗАКОНОТ ЗА ОБЛИГАЦИОНИ ОДНОСИ

Кој го организираше терористичкиот акт во Русија?

Кој го организираше терористичкиот акт во Русија?

ИЗМЕНИТЕ НА ЗАКОНОТ ЗА ОБЛИГАЦИОНИТЕ ОДНОСИ И ЗАШТИТАТА НА ДОВЕРИТЕЛИТЕ ИЛИ ДОЛЖНИЦИТЕ ИЛИ СОЦИЈАЛНИТЕ СЛУЧАИ?

ИЗМЕНИТЕ НА ЗАКОНОТ ЗА ОБЛИГАЦИОНИТЕ ОДНОСИ И ЗАШТИТАТА НА ДОВЕРИТЕЛИТЕ ИЛИ ДОЛЖНИЦИТЕ ИЛИ СОЦИЈАЛНИТЕ СЛУЧАИ?