Против кој екс висок функционер ОЈО покрена истрага за перење пари во Србија?

Добивај вести на Viber

Основното јавно обвинителство за гонење на организиран криминал и корупција по допрен глас поведе предистражна постапка заради постоење на индиции за сторено кривично дело Перење пари и други приноси од казниво дело од чл.273 од Кривичниот законик.

Предистражната постапка, како што соопштуваат е резултат на објавените написи од страна на повеќе медиуми во Република Македонија во врска со изјавата на поранешниот српски министер за надворешни работи и претседател на Народната партија во Република Србија, Вук Јеремиќ. Изјавата се однесува на наводно перење пари во Република Србија од страна на високи македонски функционери и нивната поврзаност со физички и правни лица од Србија и Чешка.

Јавен обвинител од Основното јавно обвинителство за гонење на организиран криминал и корупција ги презема сите потребни дејствија и координација со  институциите надлежни за откривање на овој вид на кривични дела.

Имено, неодамна екс началникот на УБК Сашо Мијалков беше обвинет од страна на поранешниот министер за надворешни работи на Србија дека, Мијалков и тогашниот режим на Никола Груевски „влечеле“ пари од Македонија, па преку Рајски острови, Холандија и Чешка пласирале и „переле“ пари, кои според Јеремиќ се стекнати на корумпиран начин. Јеремиќ тврди дека за овој случај постои и меѓунардона истрага.

По ова од партијата на Груевски, се огласија и ги негираа обвинувањата.