Пуџдемон: Пуштени на слобода без кауција, нашите мисли се со колегите
Објавено во: Свет 06 Ноември, 2017
Сменетиот каталонски претседател, Карлес Пучдемон кого белгиското обвинителство денеска го пушти на условна слобода, ја критикуваше шпанската Влада поради апсењето поранешни каталонски министри.
Тој денеска на Твитер напиша дека е „слободен и без кауција“ и додаде дека неговите мисли се со колегите кои неправедно се наоѓаат во затвор.
Пучдемон и четворица поранешни каталонски министри денеска се пуштени на условна слобода, но не смеат да ја напуштат Белгија.
Пуџдемон и неговите соработници мора да останат на адресите на кои се пријавени и мора да одговорат на сите судски и полициски повици, стои во соопштението од обвинителството.
Белгиските власти ги сослушале Пучдемон и неговите најблиски соработници, кои вчера доброволно се предадоа. Ова се случи еден ден откако Шпанија издаде европски налог за нивно апсење.
Тие треба на 17 ноември да се појават пред белгискиот суд.
Пучдемон со соработниците допатува во Брисел пред една недела кога Шпанија ја смени каталонска извршна власт и воведе директна контрола над својот полуавтономен регион.