Работниците со ниски примања да се пријават за мерката за годишен одмор

Добивај вести на Viber

Денеска стартуваше јавниот повик за користење на годишен одмор за работници со ниски примања и ќе трае до 29. септември. На повикот може да се пријават работници чии примања во семејството не ги надминуваат нето приходите од 22 илјади денари и тие ќе може да искористат субвенции од 15 илјади денари за петдневен одмор во некој од туристичките центри во земјава.

Министерството за економија за оваа мерка обезбеди 60 милиони денари за споменатата категорија работници, со кои 4000 семејства ќе бидат субвенционирани во вредност од по 15 илјади денари, поточно ќе им биде издадена Потврда за користење на средства за организиран одмор за работници со ниски приходи во споменатата вредност, која ќе се користи во еден од категоризираните угостителски објекти за сместување во Република Македонија кои ќе се пријават во Министерството за економија.

Министерот Бектеши гледа две важни цели во оваа мерка креирана во полза на граѓаните: првата е, по принципот „парите кај граѓаните“ да им се помогне на семејствата на работниците со ниски примања да го искористат правото на годишен одмор, а во исто време да им се обезбеди поддршка на туристичките центри во зголемување на обемот на работа надвор од туристичката сезона.

Право за добивање на Потврда за одмор имаат сите физички лица кои се вработени и нивните месечни примања во семејството не го надминуваат нето приходот од 22.000 денари. Притоа, едно лице може да поднесе само едно барање за пријавување на интерес за користење на средства за организиран одмор, а потврдата за користење на средства за организиран одмор се издава по принципот „прв дојден прв услужен“.

Барањето треба да се достави до архивата на Министерството за економија лично или преку пошта на адреса „Јуриј Гагарин“ бр. 15 Скопје, а Листата на баратели кои доставиле уредна и комплетна документација се објавува на веб страната на Министерството за економија најдоцна седум дена од денот на утврдувањето на листата.