Рама: Македонија треба да го промени својот став кон Албанците
Објавено во: Балкан 02 Февруари, 2017
Албанскиот премиер, Еди Рама вели дека Македонија треба да го промени својот став кон Албанците во земјата, затоа што Албанците се државотворен фактор кој застана на вистинската страна од историјата.
Според него, Албанците не се малцинство, туку државотворен фактор за опстанокот на Македонија.
Тој го опиша статусот на Албанците во Македонија по предвремените парламентарни избори и пишувањата во медиумите дека Тирана влијае во неодамнешните политички случувања во Македонија.
„Би сакал кај македонската страна да видам објективитет и
реализам. Албанците повеќе не може да се влечат во
Владата и зад кочијата на Владата за неколку позиции и
возила. Албанците заслужуваат да бидат почитувани исто
како и Македонците“ - изјави Рама.
Рама изјави дека стратешкиот интерес на официјална Тирана е неподелена Македонија каде Албанците ќе бидат еднакви со Македонците. Тој ги отфрли сите гласини дека влијаел врз партиите на Албанците во Македонија да не коалицираат со ВМРО-ДПМНЕ. Медиумите од регионот пишуваа дури и дека Рама ја срушил коалицијата на ДУИ и ВМРО-ДПМНЕ.
Претходно политичките лидери на Албанците од Македонија беа на средба во Тирана со Рама, по што ја објавија својата платформа.
За ова Рама доби критики дека се меша во внатрешните работи на соседна земја.