Раул „Ел Команданте“ Гонзалез: Се е супер, треба да уживаме
Објавено во: Македонија 18 Јануари, 2018
„Ел Команданте“ селекторот на македонската репрезентација и по фантастичната прва фаза од европскиот ракометен шампионат останува скромен во своите изјави и не прави обиди да го зголеми притисокот врз ракометарите, посочувајќи дека и натаму треба да се оди чекор по чекор.
„Јас сум многу задоволен играчите дадоа се од себе, одигравме добар натпревар, особено кога има притисок каков што го имавме денеска... Се е супер, и треба да биде мирно. Утре ќе имаме одмор, ќе биде уште подобро...Како да не сум задоволен, многу сум задоволен. Имаме три бода во втората фаза, тоа е одлично. Одиме малку по малку, навистина не ги знам другите резултати. Но, оставете го тоа сега, треба да уживаме, иако играчите се уморни", изјави македонскиот селектор по натпреварот со Германија.Македонија оди како лидер во Вараждин со 3 бода пред ракометните гиганти како Шпанија, Данска, Чешка и Германија со 2 бода, и Словенија со 1 бод од првата фаза. Прв дуел во втората групна фаза играме против Шпанија на 21 јануари во борба за полуфинале на ракометното првенство кое се игра во Хрватска, а потоа со Чешка на 23 јануари и против Данска на 24 јануари.