Реакции во Грција затоа што Бутарис ја нарече нашата земја Македонија
Објавено во: Балкан 17 Ноември, 2017
Грчките медиуми денеска реагираат на фактот дека градоначалникот на Солун, Јанис Бутарис, при посетата на Скопје повторно го употреби името „Македонија“, означувајќи ја соседната земја.
Медиумите наведуваат дека зборувајќи на англиски јазик пред новинарите Бутарис по средбата со премиерот Зоран Заев, предложи следната средба на премиерите на Грција и Македонија да се одржи во Солун.
Тие потсетуваат дека Бутарис и за време на минатогодишната посета го употребил името Македонија во интервју за телевизиска станица.
Бутарис вчера престојуваше во Скопје во рамки на обидите за имплементирање мерки на доверба меѓу двете земји и при тоа оствари средби со премиерот Зоран Заев, претседателот Ѓорге Иванов и со министерот за надворешни работи, Никола Димитров.
Грчките медиуми пишуваат и за средбата на посредникот на ОН во разговорите за прашањето на името меѓу Македонија и Грција Метју Нимиц, која е закажана за 11 и 12 декември во Брисел.
Инаку Бутарис има влашки корени и потекло од Крушево.