Рединг: Време е Европа да ги решава проблемите на свој сопствен начин

Добивај вести на Viber

Времето на тројката меѓународни кредитори е изминато и Европа веќе е подготвена да ги решава проблемите на свој сопствен начин, изјави во интервју за грчкиот весник „Катимерини“, заменик-претседателот на Европската комисија, Вивиен Рединг. - Европските граѓани не и веруваат на тројката, Европската унија, Европската централна банка и Меѓународниот монетарен фонд, и тие се во право. Фундаметалните одлуки, како на пример, дали да бидат отпуштени десетици илјади државни службеници, не треба да бидат донесувани зад затворени врати - изјави Рединг за грчкото издание. Рединг објаснува дека кога Европа беше потресена од кризата, таа мораше да дејствува многу брзо и затоа побарала помош од ММФ поради „искуството и експертизата во справувањето со тешки ситуации, како онаа со која се соочува Грција“. - Ние сме благодарни за придонесот на ММФ кон различните стабилизациони програми во Европа, но веќе не сме во критична состојба. ЕУ веќе ги има неопходните инструменти за да се справи со сопствените проблеми. Затоа велам: времето на тројката измина - рече таа. Таа посочи дека промената на овој формат нема да се случи во следните неколку недели или месеци и додаде дека идната година ќе се одржи дебата за иднината на Европа, кога ќе треба да биде направен избор кога да се заврши со тројката и „да се воведе демократско, европско решение“.