РИСТОСКА ЗА ЗАМРЗНУВАЊЕ НА ИМОТОТ НА ВМРО-ДПМНЕ: Oна што го преземаме ние е во заштита на партијата

Добивај вести на Viber

Oбвинителката Ленче Ристоска од СЈО денеска изјави дека е одбиено барањето на СЈО до Врховниот суд за заштита на законитост против одлуката на Кривичниот суд каде што беше одбиено замрзнување на имотот на ВМРО-ДПМНЕ во случајот „Талир“. 

Таа вели дека главен аргумент на СЈО за замрзнување на имотот е дека веќе еднаш во 2016 година, имотот бил ставен под хипотека кај една од комерцијалните банки.

Ристоска објаснува дека замрзнувањето на имотот е само привремено. Таа ги отфрла тврдењата на ВМРО-ДПМНЕ дека СЈО работи во полза на власта

„Со тоа само би се ставила забрана раководните лица да не можат го отуѓуваат имотот и да нанесат дополнителна штета на политичката партија. Ако ја земаме политичката партија како правен субјект, она што го преземаме ние е во заштита на партијата“- изјави Ристоска.

Врховниот суд во наредните денови треба да донесе одлука дали ќе го прифати барањето за заштита на законитоста поднесена од СЈО.

Таа кажа дека истрагата за случајот „Талир“ продолжува, но не даде детали.

Првоосомничен во случајот „Талир“ е претседателот на ВМРО-ДПМНЕ, Никола Груевски, а осомничени се и пратениците Илија Димовски, Даниела Рангелова и екс-премиерот Емил Димитриев, генералните партиски секретари Мартин Протуѓер и Кирил Божиновски, шефовите на центарот на комуникации, Александар Бичиклиски и Иво Котевски.