ФАКТОР МАГАЗИН: Невозможни се реформи во здравство се додека има партиско назначување на директори

Добивај вести на Viber

Професорoт Рубинчо Заревски во Фактор магазин изјави дека во Македонија четири години, а можеби и повеќе постои паралелен увоз на лекови. 

Според него, целта била да се намали цената на лековите, но таа цел не е постигната. 

„Целта не е постигната затоа што наспроти фактот што големите претстаништва на лекови во Македонија ги затворија своите операции, затоа што стана неисплативо, и наспроти фактот што најголем дел од лековите се увезуваа од Турција, бројот на препишани лекови во Македонија во последните 10 години се дуплираше. Не дека народот стана поболен, и поголеми се заболувањата, туку квалитетот на тие лекови не е оној што се плаќа. Добро ќе беше ако паралелниот увоз се дозволеше, меѓутоа да беше строго контролиран, но тоа не се случи“ - рече Заревски. 

Според него отсега мора да се внимава на квалитетот. 

Д-р Маја Парнаџиева Змејкова, поранешен директор на ФЗОМ вели дека квалитетот мора да се проверува и одржува. 

„Исто така институцијата е задолжена да прима било какви пријави, дали од доктори, дали од корисници, односно од пациенти, да ги пријави, анализира, и постапува по било какви несакани ефекти кои можат да произлезат од било кој лек. И во тој контекст мислам дека е потребно инстутуцијата надлежна за тоа да каже какви чекори преземала во овој период и дали се детектирани или не проблеми“ - рече Парнаџиева Змејкова. 

Таа вели дека квалитет и финансии се клуч за успех за да  еден здравствен систем  функционира нормално.