Руски фирми подготвени за соработка во земјоделство
Објавено во: Агробизнис 19 Ноември, 2012
Бизнисмени од Македонија и Тамбовската област од Руската Федерација денеска присуствуваат на бизнис форум и би-ту-би средби во Стопанската комора на Македонија. Претставниците на компаниите од Тамбовската област ќе посетат и неколку конзервни фабрики во Гевгелија и во Струмица заради евентуално склучување на договори за извоз на конзервирано овошје и зеленчук.
- Република Македонија и Тамбовската област по територија и по население се многу слични. За нас е многу интересно да соработуваме пред се во винската, конзервната и дел од лесната индустрија. Би сакале на Македонија да и понудиме шекер, пченица и сончогледово масло, изјави претставникот од Тамбовската област, Владислав Михајлович Јуриев.
Директорот на Македонско-Руската стопанска комора, Дејан Бешлиев нагласи дека трговската размена меѓу Македонија и Руската Федерација годинава бележи пад од околу 40 отсто во однос на лани.
- Тоа пред се должи на европската криза. Наша задача како Комора е да ги отвориме патиштата за извоз во Руската Федерација за што сметам дека имаме прилично добри шанси. Токму денешната посета на бизнисмени од Тамбовската област е резултат на таквите активности, изјави Бешлиев.
Тамбовската област е федерален регион во Русија, се наоѓа околу 460 километри јужно од главниот град, еден од главните центри за нанотехнолошки иновации. Според пописот од 2002 година, во оваа област живеат 1,2 милиони жители. Административен центар е градот Тамбов.
Можеби ќе ве интересира
ДОЖДОТ Е ПОВЕЌЕ ОД ДОБРЕДОЈДЕН: Сепак температурните шокови можат да направат проблеми на земјоделските насади
СТОЧАРИТЕ НУДАТ ПЛАТА ОД 1.000 ЕВРА: Албанија е последната станица за наоѓање овчари
