САД ги повика Турција и Холандија да ја „смират топката“
Објавено во: Балкан 15 Март, 2017
САД ги повикуваат властите во Турција и Холандија да ја разрешат создадената конфликтна ситуација и да избегнуваат „ескалирачка реторика“.
Ова го објави на брифинг пред новинарите портпаролот на Стејт департментот на САД Марк Тонер.
„Ова е билатерално прашање меѓу владите на Холандија и Турција. Двете земји се сојузници во НАТО и ние би сакале да ги повикаме да избегнуваат ескалациона реторика, да работат заедно врз основа на меѓусебно почитување, да се обидат да ги решат несогласувањата околу ова прашање“, рече дипломатот.
Тој го избегна одговорот на прашањето кого го обвинуваат САД за создадената ситуација. Тонер само повика повторно земјите да работат заедно за решавање на проблемот.
Турција ги замрзна односите на високо ниво со Холандија, откако порано холандската влада го одврати спроведувањето на агитациони собири од страна на турски политичари во Холандија за претстојниот референдум за трансформирање на Турција во претседателска република, каква што сака Ердоган.
Покрај тоа Анкара нема да му дозволи на холандскиот амбасадор да се врати во Турција.
Сепак Турција соопшти дека засега нема да го отповика амбасадорот од Холандија, но хо смета прашањето и за економски санкции.
Потсетуваме дека денес (15 март) во Холандија се одржуваат парламентарни избори.