Сакал да го продаде Дејтонскиот договор „на црно“ - колку пари барал?
Објавено во: Балкан 01 Ноември, 2017
Лицето кое се сомничи дека се обидело да го продаде оригиналниот Дејтонски договор денеска ќе биде испитан во јавното обвинителство во Бања Лука.
Жељко Кунтош(48) од Пале вчера беше уапсен под сомнение за кривичните дела трговија со влијание и фалсификување или уништување службена исправа. Тој се сомничи дека откако дошол во посед на оригиналниот текст на Дејтонскиот договор на англиски јазик, се обидел да го продаде за 100 илјади конвертибилни марки, односно за околу 50.000 евра.
Кунтош беше возач, телохранител и еден од најблиските соработници на поранешниот претседател на Народното собрание на Република Српска, Драган Калиниќ.
На документот биле оригиналните потписи на поранешните претседатели на Хрватска и тогашната СР Југославија, Фрањо Туѓман односно Слободан Милошевиќ, како и на поранешниот претседател на Претседателството на БиХ, Алија Изетбеговиќ.
Со Дејтонскиот договор во 1995 година беше запрена три и пол годишната крвава војна во Босна и Херцеговина.
Босанскиот оригинал на договорот беше пријавен за исчезнат во 2008 година.