Се јавија и Тврдокорните - Договорот со Бугарија е против националните интереси
Објавено во: Македонија 28 Јули, 2017
Движењето „Тврдокорни“ кое прв пат се профилираше со протести против Тиранската платформа сега се противи на Договорот за добрососедство со Бугарија кој го смета за спротивен на националните интереси и по долго време на отсуство од македонската политичка сцена повторно се јави со жесток говор на прогласување на патриоти и предавници.
Според нив, најкритични е член 8 дека двете Договорни страни ќе организираат со заемна согласност заеднички чествувања на заеднички историски настани и личности, насочени кон зајакнување на добрососедските односи во духот на европските вредности.
„Бугарскиот хегемонизам кон Македонија некогаш и денес беше душмански насочен кон македонскиот идентитет и македонската државност. Може да славиме заеднички откако ќе се извинат за големите злосторства извршени над невино македонско население многу пати низ минатото. Само тогаш и на таков начин можат да покажат дека го смениле својот подмолен однос и сфатиле дека треба да ја почитуваат македонската личност и имаат добри намери кон нас Македонците. Што ќе славиме заеднички кога неспоредливо повеќе има за извинување од бугарска страна отколку нешто добро што ни дошло од источните соседи. Навистина има поединци од бугарска националност кои учествуваа во македонските национални движења но најчесто истите истовремено од тогашната бугарска држава биле сметани за терористи. А поретко, ако биле лица потпомогнати од бугарската власт тоа биле бугарски агенти со антимакедонски задачи“, велат од здружението.
Според нив, македонските малцинства во Пиринскиот и Беломорскиот дел се еден од најдобрите и најнеоспорните докази за самобитноста на македонскиот народ бидејќи ги руши нивните агресивни хегемонистички „теории за измисленоста на македонската нација“.
- Не може во рамките на нивните држави, етничко население по целата територија на одредено подрачје да успее да ги измисли некој од надвор и истите откако од надвор биле измислени грчевито со децени со векови независно од политичкиот систем да не се откажуваат од македонската национална свест. Ако нема етничко македонско малцинство во границите на вашите држави тогаш зошто ви се потребни договори со вакви барања!?, прашуваат „Тврдокорните“.
Тие праќаат порака до Бојко Борисов, Зоран Заев и Љубчо Георгиевски: „Тука е Македонија и вие не заслужувате да го дишете нејзиниот воздух“!