Се кршат копјата, продолжуваат преговорите за европскиот буџет
Објавено во: Свет 08 Февруари, 2013
„Европските лидери се многу близу до договор за основните рамки на буџетот на Унијата за периодот 2014-2020 година, со расходи од 960 милијарди евра за седумгодишниот период“, наведуваат западните медиуми врз основа на информациите од извор близок со преговорите.
Според ваквите тврдења, Велика Британија издејствувала дополнителни намалувања на административните расходи на Европската унија.
Инаку и денеска лидерите на ЕУ продолжуваат со преговорите за буџетот, но по повеќе од 14 часа се уште нема договор во Брисел, јави ДПА.„Ситуацијата се уште изгледа особено тешка. За првпат постои можност за реално намалување на буџетот. Досега тоа се нема случено,“ изјави претседателката на Литванија Далија Грибаускаите, која беше еврокомесар за буџетот од 2004 до 2009 година.
Велика Британија, Германија и други земји од Северна Европа повикуваат буџетот на ЕУ да биде намален поради строгите мерки за штедење, кои се наметнуваат во националните финансии. Земјите од Јужна и Источна Европа сепак се противат на намалувањата, бидејќи стравуваат дека нивните сиромашни региони ќе загубат значителна финансиска помош од ЕУ, додавајќи дека буџетските намалувања негативно ќе влијаат на економскиот раст.