Се затруле со сендвичи од позната сендвичарница
Објавено во: Македонија 18 Август, 2017
Осум лица се задржани на инфективната клиника во Скопје, а четири се згрижени во амбуланти поради труење со храна.
Тие имале стомачни проблеми и висока температура откако конзумирале сендвичи во „Сендвичара 7“ во Скопје.
За добиени пријави за заразно заболување за лица кои конзумирале храна – сендвичи во објектот „Сендвичара 7“ бил информиран денеска Државниот санитарен и здравствен инспектор од Карпош од Центарот за јавно здравје – Скопје.
Од увидот во сендвичарницата е утврдено дека општата санитарно-хигиенска состојба во објектот е добра и дека во него не се врши подготовка на храна туку се подготвува во централна работилница.
Од МЗ велат дека за сите вработени лица доставени се уредно заверени санитарни книшки за месец март.
За бактериолошки мониторинг во врска со труењето од сендвичарницата земени се примерок, испирок од раце на вработена која ги подготвувала плескавиците, брисеви од грло и нос на три вработени кои послужуваат на пулт и брисеви од работни површини и мостри од храна.
Инспекторите донеле решение за затворање на сендвичарницата. Тие наложиле превентивно да се изврши вонредно темелно механичко чистење на просторот, опремата и работните површини, да изврши вонредна дезинфекција, дезинсекција и дератизација и да се изврши вонреден здравствено хигиенски преглед на вработениот персонал.
Истите мерки е наложено да се спроведат и во работилницата на угостителскиот објект.