Села сака да се врати во Владата на Заев?
Објавено во: Македонија 22 Јануари, 2018
Зијадин Села од Алијансата за Албанците синоќа изјави дека и понатаму Алијансата е отворена за преговори за нејзино враќање во Владата на премиерот Зоран Заев.
Секако важно е за нив да се исполнат веќе познатите барања, дополнети со барањето за одговорност за корупција на сите партиски функционери без разлика од нивната етничка припадност.
Села рече дека имаат чести средби со меѓународните фактори кои барале од нив да бидат дел од Владата, затоа што како што вели, „без пратениците на Алијансата, Заев не можеше да изгласа Влада“.
„Сите анкети покажуваат дека кај Алијансата има рапиден раст на рејтингот и покрај тоа што сега е во опозиција“- изјави Села.
Тој ја критикуваше ДУИ, бидејќи смета дека партијата ништо не сторила за правата на Албанците. Оценката на Села е дека на претстојните избори партијата на Али Ахмети ќе доживее катастрофален неуспех, а Алијансата за Албанците е партија во која нема корумпирани функционери и очекува продолжување на зголемување на рејтингот.