Добивај вести на Viber
Конечен предлог до Северна Кореја за преговори за обновување на работата на индустриската зона Кесонг, испрати денеска Јужна Кореја. Индустриската зона еднострано беше затворена од страна на Пјонгјанг во април.
На овој предлог му претходеа шест рунди преговори изминатите недели кои не успеаја да ги придвижат работите.
Предлогот на Сеул беше предаден на граничниот пункт Панминџон во демилитаризираната зона, каде беше потпишано примирјето, со кое е ставен крај на Корејската војна (1950-1953 година).
- Уште еднаш упатуваме барање до Северна Кореја да направи добар избор, кој ќе доведе до нормализација на работата во Кесонг и на меѓукорејските врски. Доколку Пјонгјанг не даде јасен одговор на барањето на Сеул да гарантира дека нема еднострано да го затвора Кесонг, Јужна Кореја ќе биде принудена да донесе „сериозна одлука“ - изјави портпаролот на Министерството за национално обединување, Ким Јон-сук, кој не сакаше да прецизира за какви мерки станува збор.
Откако Северна Кореја им го забрани пристапот во Каесонг на 53-те илјади Севернокорејци кои работат таму, загубите на 123-те компании од Јужна Кореја, кои отворија фабрики во зоната, достигнаа 935 милиони долари.
Во знак на добра волја Сеул дозволи денеска испраќање на хуманитарен транспорт за Северна Кореја. Пет организации добија зелено светло да и достават на Северна Кореја лекови, храна и детска облека. Освен тоа Сеул додели и 4,5 милиони евра за проекти за севернокорејските деца, кои се поддржани од УНИЦЕФ.