Северна Америка се бори за срцето и паричникот на Амазон
Објавено во: Свет 22 Октомври, 2017
Amazon.com добива понуди за даночни олеснувања и други преференции во вредност од милијарди долари од цела Северна Америка, пишува Reuters. Во моментов американската компанија прави конкурс, по кој ќе процени каде ќе изгради втора централа HQ2. Инвестицијата ќе биде околу 5 милијарди долари и се очекува да создаде 50 илјади нови работни места.
Основните барања на Amazon се инвестициската дестинација да биде метропола со население од над 1 милион лица, добро образовано население, добро организиран градски превоз и, очигледно, пониски трошоци во однос на оние кои ги има централата во Сиетл, САД.
Од Amazon велат дека ќе ја објават одлука следната година.
"Нема подобро место за водење бизнис од Канада", напишал премиерот Џастин Трудо во писмо до главниот извршен директор на Amazon Џеф Безос, испратено на 13 октомври.
Слични намери има и Калифорнија. Според информација на Reuters локалната власт е подготвена да даде даночни олеснувања во вредност од 1 милијарда долари во следната деценија.
Џејсон Лери - градоначалникот на Стонкрест, предградие на Атланта, има еден значително екстраваганен предлог. Тој има намера да користи 345 акри, за да изгради град Amazon, а Џеф Безос ќе биде негов доживотен градоначалник.
Откако е формирана во 1994 година како онлајн продавница, Amazon постојано се обидува да оптимизира плаќање даноци. Како за себе, така и за своите клиенти. Така на пример во последниве години компанијата не вклучува во цената на некои свои производи данок на промет и се обидува да прима олеснувања од различни влади.