СФДМ: Семинар за спречување перење пари и финансирање на тероризам

Добивај вести на Viber

За разлика од поголемиот дел на синдикати во Република Македонија кои своите активности ги сведуваат на набавка на прехранбени продукти и новогодишни пакетчиња, Синдикатот на финансиски дејности на Македонија (СФДМ) промовира и презема активности за информирање и едукација од стручен карактер, стои во денешното соопштението од СФДМ. Семинарот ќе се одржи на 21.12.2012 година, петок, во просториите на ССМ со почеток во 12 часот. Како што појаснуваат од СФДМ, имајќи го во предвид интересот за одредени прашања од регулативата и банкарската практика кај стручната јавност, на овој семинар ќе се разговара за начините на спречување перење пари и други приноси од казниво дело и финансирање на тероризам. Исто така, ќе бидат обработени одредени аспекти од анализата на клиентите на финансиските институции, при што посебно внимание ќе биде обрнато на начинот на утврдување на крајниот сопственик. „Иако утврдувањето на крајниот сопственик на клиентите претставува обврска на финансиските институции веќе неколку години, сепак во стручната јавност подолго време се појавуваат различни ставови, дилеми, па и спротивставени мислења во однос на ова прашање. Поаѓајќи од определбата на СФДМ да даде одговори на отворените прашања кои се присутни во финансиската сфера, се донесе одлука да се организира семинар посветен на оваа проблематика“, стои во соопштението од СДФМ. Семинарот ќе биде отворен од страна на претседателот на СФДМ м-р Гоце Селовски, а свое обраќање ќе има д-р Владимир Наумовски - експерт за спречување на перење пари. Стручниот дел од семинарот ќе биде презентиран од страна на м-р Мирјана Ѓорѓиоска и д-р Гоце Трајковски.