ШАНСА ЗА ПРИХОД ПЛУС: Старата гардероба ја продаваат на интернет

Добивај вести на Viber

На Фејсбук страници граѓаните од Македонија се почесто ја нудат на продажба гардеробата која е стара или пак ја добиле на подарок, но не планираат да ја носат.

Скопјанка пред 20-тина дена направила профил Женска гардероба каде нуди различни парчиња облека. Вели дека работата оди подобро од она што очекувала.  Скопајнката раскажува дека ова некои луѓе го прават со години и имаат повеќе клиенти,  а таа се труди да има што е можно подобар пристап кон  купувачите. Ја создала  страницата на социјалните мрежи за да го понуди она што веќе е мало, големо, или пак  го добила на подарок, но не е нејзин стил и нема да го носи. Се продаваат чевли, ремени, кошули, панталони, јакни, сакоа, а цените најчесто се движат од 150 до 500 денари. Покрај фотографиите со облеката, има и краток опис за парчето гардероба.

„Има многу поголеми и посериозни страници кои се занимаваат со препродажба на secondhand гардероба.  Целта ми е да ги распродадам сите работи кои не се користат, а зафаќаат место. Најчесто се купуваат детски работи и XL/ XXL гардероба.  Кај мене купуваат само жени,  досега ниту еден маж не се јавил. Жените купуваат во период од 1 до 5 во месецот, кога земаат плата.  Некогаш се случува да продадам 10 парчиња на ден, а некогаш  по недела дена ништо“ – раскажува оваа скопјанка.

Нашата соговорничка објаснува дека уште месец или два ќе продава гардероба, а потоа планира да се пресели во странство.

Граѓаните од друга страна велат дека би купиле ваква облека, но само ако е добро сочувана.

„Зависи колку е сочувана и како изгледа. За мене би било поинаку да отидам и да видам како изгледа,  а вака преку интернет не знам. Малку сум скептична затоа што е онлајн, а онака би купила“ – вели тинејџерка.

За сите идни продавачи вели дека е важно да понудат  добро сочувана, испрана, испеглана облека, по минимални цени и да пристапат со  голема љубезност кон оние кои се заинтересирани да купат.

Сања Атанасовска