Шекеринска им порача на болните од рак на дојка: „Не сте сами!“

Добивај вести на Viber

Радмила Шекеринска, заменик претседателката на СДСМ денес даде поддршка за жените коишто се борат со ракот на дојка, и порача дека „тие не се сами“.

- Ова општество и оваа држава и сите ние, сакаме да дадеме поддршка и да покажеме дека превенцијата е важна, дека само прегледите спасуваат животи, а дека државата и здравствениот систем мора да направат се, за да им помогнат на сите оние коишто страдаат од оваа болест, изјави Шекеринска.

Таа изјави и дека нејзината партија се залага за зголемување на бројот на лекови на позитивната листа коишто се напредни, коишто овозможуваат на жените да живеат со оваа болест, да се справуваат со болеста, и да го вратат назад своето здравје.

- Денеска сите заедно треба да ја испратиме пораката дека ова е болест, со којашто можеме заедно да се бориме, и да спасуваме многу животи на жените во Македонија.

Со симболична прошетка и хуманитарна трка (во должина од еден километар) во рамки на манифестацијата „Напред розово“ во организација на Здружението „Борка“ – За секој нов ден, граѓаните денес дадоа поддршка на болните од рак на дојка и на нивните семејства. Настанот се одржува денеска во Градскиот парк во Скопје кај Школка.