Што е квасец за профитот на НЛБ Банка?
Објавено во: Економија 09 Август, 2017
Резервациите се „џокерот во ракав“ на НЛБ Банка во првите шест месеци годинава во кои таа успеа да прокнижи најдобар резултат досега, покажуваат податоците што ги објави таа банка на Македонската берза за хартии од вредност. Резервациите за пласманите на таа банка во првите шест месеци годинава се за речиси 175 милиони денари пониски од резервациите во истиот период лани. Тоа е сума што значајно влијаела врз растот на добивката на банката кој изнесува 929,7 милиони денари и е за 353,9 милиони денари поголем од лани.
Што се случи со резервациите на НЛБ во првите два квартали?
Многу важно за резервациите на НЛБ Банкае тоа што во првиот квартал банката ги прикажува во позитивен контекст и тоа е износ од 63,8 милиони денари односно над 1 милион евра. Тоа влијае супер врз добивката за прв квартал која надмина 570 милиони денари. Тоа значи дека се ослободени средства на банката кои биле резервирани за кредити. На крајот од вториот квартал годинава банката книжи резевации во износ од 102,68 милиони денари и тие ги прикажува како трошок (со знак минус) што значи дека се нововпишани. Тоа е значајна разлика за вториот квартал во однос на првиот кога според податоците банката ослободила резервации во износ од 1 милион евра.
Приходот од камати паѓа, но банката јако ги скастри расходите за камати
Од клучните параметри од кои се создава сликата за работењето на банката најважни се следниве: нето приходите од камати изнесуваат 1,417 милијарди денари и во споредба со истиот период лани се повисоки за 88,9 милиони денари во споредба со истиот период лани и тоа е раст од 6,7 отсто. Банката успеала да ги намали расходите за камати за 108 милиони денари. При тоа важно е да се истакне дека вкупниот износ на камати годинава е понизок во споредба со лани.
Кај надоместоците и провизиите банката годинава успеала за првите шест месеци да стигне до нето позитива од 488,4 милиони денари што е за 22,4 милиони денари подобар резултат од лани.
Паѓа обемот на кредитирање, намалена и депозитната база!
Обемот на кредитна активност на оваа голема банка бележи намалување во споредба со истиот период лани и тоа е преседан во последните три години. Обемот на кредитното портфолио на 30 јуни е 45,6 милијарди денари, а истиот период лани бил 46,09 милијарди денари. Намалувањето е половина милијарда денари. Пад бележи и вложувањето во хартии од вредност и тоа за речиси една милијарда денари до износ од 4,68 милијарди денари.
Очекувано оваа промена е во корелација со намалувањето во депозитната база на банката. Имено на 30 јуни годинава депозитите на коминтенти со исклучок на банките се на ниво 56,14 милијарди денари, а лани во истиот период беа 58,09 милијарди денари. Депозитите се намалени за речиси 2 милијарди денари во споредба со истиот период лани.
Првиот квартал бил подобитен од вториот!
Споредбата на двата квартали годинава покажува дека банката имала подобитно прво тромесечје. На крајот на март добивката на банката изнесува 572,2 милиони денари и во споредба со првиот квартал во 2016 година бележи раст од 211 милиони денари.
На полугодие добивката на банката е 929,7 милиони денари. Тоа значи дека во периодот април-јуни добивката на банката изнесува 357,5 милиони денари. Тоа е за 214,7 милиони денари помалку од првиот квартал!
Р.Ф.