Што е заедничко за нападите во Париз, Брисел и Манчестер?

Добивај вести на Viber

Американскиот конгресмен, Мајк Мекол вели дека во нападот во Манчестер Арената користен е експлозив ТАТП, ист како оној употребен во нападите во Париз и Брисел.

Мекол кој претседава со Комитетот за национална безбедност на американскиот Конгрес додава дека „нивото на софистицираност“ на бомбата укажува дека оној што ја направил имал обука од странство.

„Доказите собрани досега укажуваат дека нападот во Манчестер не е случај на еден осамен напаѓач“ - рече Мекол.

Ист таков експлозив е користен во нападот во Париз во 2015 година и во Брисел во март лани. Двата напади ги извршија терористи од организацијата „Исламската држава“.

Скај њуз, повикувајќи се на извори во германската разузнавачка служба објави дека Салман Абеди, осомничен за самоубиствениот напад бил во Германија, во Диселдорф, четири дена пред нападот.

На фотографиите кои ги објави телевизијата наводно се гледа како напаѓачот купил ранец за кој полицијата верува дека го употребил за да ја скрие бомбата која ја активирал. 

Во нападот за време на концертот на американската пејачка Аријана Гранде во понеделникот навечер беа убиени 22, а 59 лица беа ранети.