Што им порача Хан на Косово и Србија?

Добивај вести на Viber

Европскиот комесар за проширување на ЕУ, Јоханес Хан денеска ги повика Србија и Косово да не го загрозуваат она што го постигнале благодарение на меѓусебниот дијалог. 

Хан на прашањето дали со изјавата на српскиот претседател Томислав Николиќ дека Србија е подготвена да испрати војска на Косово доколку се загрозени животите на Србите, Белград всушност „гледа назад“, тој потенцирал дека „сите оние кои гледаат назад, не гледаат напред“.

Тој пред состанокот на министрите за надворешни работи од ЕУ во Брисел посочи и дека двете земји треба да гледаат напред, а не назад. На дневен ред на состанокот се прашањата за Сирија, Либан и мировниот блискоисточен процес.

Последниве два дена се заострија односите меѓу двете земји, кога Србија се обиде да испрати воз за Косовска Митровица по цели 18 години. Но, подоцна од безбедносни причини тој запре во Рашка. 

На возот на повеќе јазици пишуваше „Косово е Србија“, а и имаше фрески. 

Веднаш потоа српскиот премиер, Александар Вучиќ изјави дека тоа го направиле од безбедносни причини за да не дојде до судири. 

Албанскиот премиер, Еди Рама изјави дека во иднина Србите ќе одат на Косово, но како туристи. 

Косовскиот претседател Хашим Тачи вели дека „целите на Србија денеска се идентични со оние на Слободан Милошевиќ во 90-тите години“.