Што утврди инспекторатот за Бадникарските детски поворки?
Објавено во: Македонија 11 Јануари, 2018
По контролите кои ги изврши Државниот просветен инспекторат утврдено е дека немало организирано верско делување во основните училишта за бадникарските поворки во кои учествуваа голем број на деца како дел од една понова манифестација иницирана од МПЦ и невладини здруженија на граѓани.
Инспекциите беа побарани од страна на Министерството за образование и наука со цел да се утврди дали се нарушени начелата на секуларизам при организација на децата за учење на бадникарските песнички, изработка на иконографија за празникот и други активноста под државна капа.
Записниците од увидот се разгледани и констатирано е дека училиштата не учествувале во организација на верската манифестација – потврдија од инспекторатот.
Градоначалниците кои беа посетени од дечињата за Бадник ги бранеа своите постапки со ставот дека тие не учествувале во организацијата, туку само ги информирале родителите.
Улогата на училиштата и локалните власти во бадниковите поворки ја истражува и Народниот правобранител. Од Меѓаши велат дека ќе излезат со реакција по затворањето на истрагата која ја води омбудсманот.