СКАПИ БАНКАРСКИ УСЛУГИ: Од провизии наплатени 49 милиони евра за шест месеци

Добивај вести на Viber

Водење трансакциска сметка, плаќање на сметки за струја, вода, парно, извршување на решение за присилна наплата или налог од извршител, опомена за минусно салдо, а некои банки наплаќаат и за проверка на салдо на банкомат. Ова се само дел од десетиците видови провизии и надоместоци кои домашните банки им ги пресметуваат на клиентите. Најчесто, клиентите не се доволно информирани за овие давачки и не ретко се изненадени и револтирани од висината на овие суми.

Иако, навидум износите во некои случаи се ниски и се движат од 30денари до 100 денари, сепак, парите од провизии и надоместоци им се и тоа како слатки на банките. Најсликовит е примерот со сметките за радиодифузна такса. Ако ја пресметаме провизијата што се наплаќа од околу 650.000 домаќинства и 70.000 фирми, сумата што месечно ја прибираат банките по тој основ е околу 13,6 милиони денари или 225.000 евра. Пресметките покажуваат дека за една година банките наплатуваат 2,7 милиони евра само од провизија за наплата на сметките за телевизија.

Уделот од провизии и надоместоци вообичаено се движи околу една третина во вкупните приходи и добивка на банките. Податоците од Народната банка на Македонија покажуваат дека во првото полугодие од 2017 година домашните банки наплатија вкупно 210 милиони евра од камати, надоместоци и провизии. Речиси 161 милиони евра се наплатени од камати, а на свое конто банките ставиле 49 милиони евра од надоместоци и провизии. Чистата добивка на банките за првите шест месеци изнесува 50 милиони евра.

Македонските банкари велат дека реалните трошоци кои ги имаат за овие услуги се критериумите врз кои ги формираат износите на банкарските провизии и надоместоци. Тие советувааат, за да се намалат трошоците на клиентите, што помалку да се користи готовина и плаќањата да се вршат преку електронско банкарство наместо на шалтери.

- Влезните параметри при креирање на провизиите и надоместоците, се реалните трошоци кои Банката ги има за да го овозможи сервисот за кој наплатува надоместок- велат во НЛБ банка.

Во Комерцијална банка Скопје објаснуваат дека редовно ги следат пазарните движења на економијата во земјата и во согласност со ресурсите кои ги користат при развој и одржување на производите и услугите кои се нудат вршат формирање на износите на провизиите и надоместоците во банкарското работење.

- При одредувањето на овие износи главна компонента се трошоците од аспект на ресурси (човечки, материјални и технички), трошоци за пресметковно-платежни активности, а дополнително се земаат в предвид и промотивните активности кои ги превзема Банката, како и потребата од пренасочување на клиентите во користењето на современите  канали за спроведување на финансиски активности- велат во Комерцијална банка.